Hajao ny fahadiovana !

Dia mba nanaraka ilay soratononina izay nalefa tao amin'ny fandaharana Vahatra, TVM sy RNM hono izato izy, mba ho fanandratana ny teny Malagasy, araka ny kinendrin'ny Akademia Malagasy.

 

Fa tsara tokoa ny hafatra tao anatin'ilay lahatsoratra, ka dia zaraiko aminareo eto, no sady mba mitsapa fahaizana koa e !

 

Indro kely anefa hoy ny mpandrafitra :

1. Na izaho no miadam-panoratra teny Malagasy na ilay soratononina no voatonina haingana loatra fa dia nijaly ny tanana nanenjika an'ilay fanoratana ! Raha tsy naka feo dia betsaka ny teny na fehezanteny voadingana.

2. Misy teny sasany (teny voatsipika), tsy dia tena nahatoky tena aho amin'ny fanoratana azy na tena tsy azoko mihitsy ny dikany dia nangalam-pijery tao anaty Rakibolana.

 

Dia izay ary ilay hafatra : "Hajao ny fahadiovana !"

<< Nampisy adihevitra teo amin’ireto mpianaka ny fahitana ny soratra « Hajao ny fahadiovana» teo amina toerana iray.

Mba mahatseriky (1) ahy, anako, ny mahita an’ireny soratra « Hajao ny fahadiovana ! » ireny, mila ho isaky izay toerana alehako ! Izany matetika no mahatonga ahy hanonofy. Ny zava-tsy hananana sy tsy hita mantsy, anaka, no mahatonga ny saina hamorona ny tsy misy.

Ka manonofy inona ianao, ry Neny ?

Nofiko, mazàna, fa nanokana andro iray hiatoana, hono, ny Malagasy manerana ity Nosy ity. Natokana ho andro tsy hisainana afa-tsy fahadiovana io andro io. Dia miara-misalahy ny rehetra manao asa fanadiovana, toy ny fisorohana ny lobolobo manerana ny tanàna, fanalana ireo fako manentsina ny tata-drano, fanalana ny loto teny an-doharano, dia nangonina ireo karazam-pako ka navory teo amina toerana iray ary nodorana avy eo. Tao anaty korataba jofom-bovoka ary setroka no nisehoan’izany rehetra izany, hany ka lositra ny loto, lomay ny valan’aretina, ringana avokoa ireo bibikely mbamin’ny voalavo mpitondra aretina. Dia fongotra, hono, ireo areti-mandoza ka ny fahasalamana mifindra indray no zary nanenika ny tanàna. Da faly aby ny olo-jiaby, velon-tsiky ny tontolo, niada-pinaritra ny ambanilanitra fa tonga ny fanjakan-drafahadiovana.

Tsara be izany nofinofinao izany, Neny ! Fa ny anohizako azy dia izao : nony nanjaka tokoa, hono, ny fahadiovana hita maso sy tsapan’ny tanana dia nahatsiaro mbola fahabangana ny Malagasy. Nifanainga indray izy rehetra mba hanadio sy hanajia (2) ny fiarahamonina satria samy nahatsapa fa ny fandio iray siny tsy mahaleo ny fandoto iray tandroka, ary tsy ny indray mandeha manta vary no handevenan-tsotrobe, na ny marivo solafaka no tsy hiarenana fa mila fiarenana ny tena, mila fihasinana ny teny, mila fandio ny tany, mba ho fananganam-pirenena. Fandio ho enti-miatrika ny fahantran-tsaina manafotra ny firenena, fandio ho enti-manasina indray ny tontolo nozimbaina. Nataony hoe “Dio taona ! Dio fanahy ! ” io fandiovana goavana niarahan’ny Malagasy tsy vaky volo nientana io.

Ho fandio taona miandra majia (3). Dia zary nifoha ka nanjaka teo amin’ny Malagasy indray ilay fahendrena mifototra amin’ny fanahy no olona.

Ho to eto amin’ity Madagasikara ity, anie, izany nofinofintsika mianaka izany.>>

(1) Tseriky = gaga. Mahatseriky = mahagaga.

(2) Hanajia : avy amin'ny hoe majia ve ?
(3) Miandra majia = manao majia